Deian a Loli - Lyric

Y Ribidirew Olaf

Da ni gyd yn gorfod tyfu i fyny rhywbryd. Neu ydan ni?

Mae hi’n ddiwrnod cyntaf Deian a Loli yn yr ysgol fawr!

Mae Deian wedi cyffroi’n lân ac ar ei draed ers cyn cŵn Caer - ond dydi Loli ddim isio mynd.

Ar ben bob dim, mae goriadau’r car ar goll ac mae Loli’n mynnu mai eu ffrind dychmygol sydd wedi eu dwyn nhw - er fod Mam, Dad a Deian yn dadlau nad ydi ffrindiau dychmygol yn bod.

Mae Deian yn sylweddoli nad oes ganddo fawr o ddewis ond ymuno efo Loli i ddweud y gair hud, a rhewi eu rhieni - gan fynd ar drywydd y goriadau coll ar antur fwyaf eu bywydau.

A fyddan nhw’n llwyddo i ddod o hyd i’w ffrind dychmygol cyn iddo fo ddiflannu am byth? A oes peryg iddyn nhw golli eu pwerau hudol wrth dyfu i fyny?

Dewch i brofi sioe theatrig gyntaf Deian a Loli wrth i’r efeilliaid direidus deithio i ben draw dychmyg a thu hwnt.

Sioe Gymraeg

BSL a Sain Ddisgrifiad

Bydd y perfformiad ar nos Iau 23 Mai, 6pm yn cynnwys dehongliad BSL gan Cathryn McShane-Kouyaté, a disgrifiad sain.

Wrth edrych ar y llwyfan o'r awditoriwm, bydd Cathryn yn sefyll ar ochr dde'r llwyfan.