O, ydy wir! Dyma enwebiad Gwobr Bantomeim y DU i ddam arbennig Theatr y Lyric

Mae Theatr y Lyric, Caerfyrddin, yn dathlu heddiw ar ôl cael ei henwi ymhlith yr enwebedig ar gyfer un o wobrau Bantomeim mwyaf y DU.

Mae Cymdeithas Bantomeim y DU wedi cyhoeddi’r rhestr fer ar gyfer Gwobrau Bantomeim 2026, ac mae un o sêr pantomeim y Lyric y llynedd, Snow White, wedi cyrraedd y rhestr ar gyfer un o anrhydeddau mwyaf y noson.

Mae’r actor, cyfarwyddwr a choreograffydd o Gaerfyrddin, Steve Elias—oedd yn swyno cynulleidfaoedd fel Dame Dolly Mixture yn Snow White y Nadolig diwethaf ac fel Dame Sylvia Scrub-it yn Beauty and the Beast yn 2025—wedi’i enwebu ar gyfer y wobr fawreddog am y Dame Gorau. Mae Gwobr Stanley Baxter am y Dame Gorau, a noddir gan John Good, yn un o’r categorïau mwyaf cystadleuol yn y seremoni, ac Steve yw’r unig dame o Gymru i’w enwebu eleni.

Yn dilyn y cyhoeddiad heddiw, meddai Steve:

“Mae’n anrhydedd a braint enfawr dod adref i Theatr y Lyric ac wedyn cael fy enwebu ochr yn ochr â rhai o’r dames gorau yn y wlad! Mewn cyfnod cymharol fyr, mae’r Lyric wedi sefydlu traddodiad pantomeim Nadolig blynyddol gyda gwerthoedd cynhyrchu a pherfformiadau gwych y mae’r cynulleidfaoedd yn amlwg wrth eu boddau. Rwy’n falch iawn y gall Caerfyrddin a Theatrau Sir Gâr chwifio eu baner a hawlio’n hyderus eu lle ymhlith y pantomeimiau gorau yng Nghymru!”

Mae Steve yn dod â chyfoeth o brofiad i lwyfan y Lyric. Ymhlith uchafbwyntiau ei yrfa mae bod yn rhan o gast gwreiddiol Billy Elliot, lle creodd rôl Mr Braithwaite, a pherfformio ochr yn ochr â Patrick Swayze yn y cynhyrchiad clodwiw Guys and Dolls yn Theatr Piccadilly, Llundain. Y llynedd fe chwaraeodd Mr Watkins yn yr adfywiad hynod lwyddiannus o Acorn Antiques gan Victoria Wood, ac fe wnaeth hefyd ei ymddangosiad cyntaf ar lwyfan Off Broadway Efrog Newydd fel cyfarwyddwr gyda’i gynhyrchiad llwyddiannus o Caitlin.

Wrth edrych ymlaen at y tymor pantomeim nesaf, rhannodd Steve newyddion cyffrous pellach:

“Rwy’n edrych ymlaen at wisgo fy wigiau a’m ffrogiau eleni yn Dick Whittington, sydd, rwy’n sicr, yn mynd i fod yn sbectacl llawn hwyl—‘mae e tu ôl i ti!’… ‘o na, nac ydy!’—i’r teulu cyfan.”

Mae pantomeim Theatr y Lyric wedi’i gynhyrchu’n fewnol gan dîm Theatrau Sir Gâr Cyngor Sir Caerfyrddin dros y tair blynedd diwethaf, gyda chefnogaeth y cynhyrchydd pantomeim blaenllaw yn y DU, Imagine Theatre. Bydd cynhyrchiad Nadoligaidd eleni, Dick Whittington (Rhagfyr 2026), unwaith eto’n cael ei gynhyrchu gan Theatrau Sir Gâr gyda chefnogaeth Imagine Theatre. Mae tocynnau ar gael nawr yn theatrausirgar.co.uk.

Cyn i’r tymor pantomeim ddechrau, mae’r sylw i gyd yn troi at seremoni Gwobrau Bantomeim.

Mae Gwobrau Bantomeim 2026 yn dathlu’r talent eithriadol, y grefft, yr angerdd a’r ymroddiad gan dimau creadigol, criwiau cynhyrchu a pherfformwyr sy’n gweithio’n ddiflino i gyflwyno profiadau pantomeim bythgofiadwy i gynulleidfaoedd ledled y DU. Bydd y digwyddiad serennog yn cael ei gynnal ddydd Sul 19 Ebrill yn Wycombe Swan, mewn partneriaeth â Trafalgar Entertainment ac ATG Entertainment (ATGE).